Page 3 - INFORME 2023 TXOSTENA

NEUTRALTASUN TEKNOLOGIKOAN ETA LANKIDETZAN
OINARRITUTAKO TRANTSIZIO ENERGETIKOA
AGURRAK

Asaldaketa geopolitikoak nagusi izaten jarraitu du 2023. urtean, eta
etorkizunaren inguruko ziurgabetasuna ere ez da nolanahikoa izan enpresetan
estrategiak ezarri behar izan direnean. Horri guztiari, Europak, teknologiaren
arloan lidergoa lortzeko helburuarekin, AEB eta Txinarekiko aldea murrizteko
izan duen erronka gehitu behar zaio. Azken batean, teknologiaren eta
industriaren arloan autonomia estrategikoaren alde egiten jarraitu nahi du.
Hori horrela, bere etorkizunari buruzko prozesua hasi du 2023an Europar
Batasunak, eta zientzia, teknologia, industria eta finantza arloko oinarri
sendoak izateari lehentasuna eman dio, Europako ikuspegi federalaz baliatuz,
AEBrekin eta Txinarekin duen harreman estua eta nazioarteko kontzertuan
duen lidergoa berreskuratzeko.

Testuinguru horretan, Batzordeak ezarritako trantsizio energetikoa gero eta
hurbilago dago neutraltasun teknologikoan oinarritutako deskarbonizazio
batetik; trantsizio energetikorako beharrezkoak diren lehengaiak kudeatzeko
jarrera bateratu batetik, eta trantsizio digitalaren, deskarbonizazio
industrialaren eta salgaien, aireko eta itsas garraioaren premia energetikoei,
zein segurtasunaren eta defentsaren behar energetikoei erantzuteko aukerei
gehiago erreparatzen dien ikuspegi batetik.

Petronor duela 8 urte konturatu zen trantsizio energetikoa eta digitala gure
estrategian nahitaez sartu behar genituen funtsezko alderdiak zirela,
Euskadiko industria-sisteman eragile garrantzitsu izaten jarraitzeko. Eta
2023an, deskarbonizazioan eta ekoizpenaren hobekuntzan erabilgarri dagoen
teknologiarik onena txertatzeko, ezarrita genuen bide estrategikoari jarraitu
diogu. Asko dago hobetzeko oraindik, baita sakontzeko ere, teknologia
digitalak gure ekoizpenaren balio-kate osoan integratzean eta merkatuarekin
duten loturan batik bat.