Juan Diegok TEKen gaitasuna nabarmendu du, “ibilbide luzeko eraldaketa prozesuak modu errazean abian jartzeko”

Juan Diego Edinorreko kontseilari delegatuak adierazi zuenez, “batzuetan inplikazio sakoneko eraldaketa-prozesuak modu sinplean jar daitezke abian”, eta horren adibidetzat jarri zuen bere enpresaren eskutik TEKak (Tokiko Energia Komunitateak) hedatzea. ‘Etorkizuneko Hiriak’ kongresuan egin zuen berba, Guggenheimen, tokiko eta nazioarteko gonbidatuen panel zabal batekin, eta ‘Karbonoan neutroak diren hirietarantz, eraginkortasun energetikoa eta mugikortasuna’ izeneko mahai-inguruan parte hartu zuen.

Petronorrek energia banaturako duen filialaren arduradun nagusiak bertaratutakoei azaldu zienez, TEKak “figura juridiko bat dira, Europako zuzentarauetan araututa daudenak”.  Zuzentarau horiek “auzotarrak, denda txikiak, ETEak eta, hala badagokio, tokiko erakundeak biltzen dituzten erakunde”  gisa definitzen dituzte,  “energia berriztagarria sortzeko iturrietan inbertitzen dutenak eta erkidego horietako bazkideentzat energia baliatzen dutenak, eta ingurumen, ekonomia eta gizarte arloko onurak sortzen laguntzen dutenak, kokatuta dauden udalerrietan”.

Gaur egun 77 dira eredu horren araberako proiektuak lantzen ari diren udalerriak, “baina kopurua itzel handitzen ari da”,  Juan Diegoren arabera, Next Generation EB Funtsekin finantzatzen diren sustapen-programak direla eta, Europako Batzordearen beraren bultzadagatik, zeinak ‘Eguzki-teilatuen Ekimenean’ aurreikusi baitu 10.000 biztanletik gorako udalerri guztietan erkidego horiek sortzea, eta Trantsizio Ekologikorako eta Erronka Demografikorako Ministerioak berak, “Segurtasuna + Energia” estrategian, figura horren garapenean eta estalki publikoen aprobetxamenduan jarri baitu arreta, energia berriztagarria sortzeko.

“Teilatuen potentzial gutxiegi erabilia izugarria da”,  ziurtatu zuen Edinorreko arduradunak, eta  “aukera ematen die herritarrei energia-trantsizioan aktiboki parte har dezaten, behatzaile pasiboen zeregina gaindituz, haien faktura elektrikoa murriztuz eta eredu elektrikoa sistema elektriko, deskarbonizatuago, deszentralizatuago eta demokratikoagoa bihurtzeko aldaketaren eta eraldaketaren protagonista bihurtuz”.