-Petrolio gordinaren labean airearen aurreberogailu bat instalatzea izan da geldialdi honetako hobekuntza teknologiko nagusia. Iberiar Penintsulan dagoen handiena da eta energia-eraginkortasuna hobetzen eta CO2 isurketak murrizten lagunduko du.
-Petronorrek 101 milioi euro inbertitu ditu guztira aurten egindako bi geldialdietan: 52 milioi euro Konbertsio unitatearen urtarrileko geldialdian eta 49 milioi euro 1. Fintze Unitatean egindako bigarren geldialdi honetan.
-Petronorren lan egiten duten pertsonekin batera, 40 enpresatako 1.200 pertsonak baino gehiagok esku hartu dute geldialdi honetan, eta guztiek geldialdiari buruzko prestakuntza espezifikoa jaso dute.
-Petronorren Geldialdiak findegiari eraginkorragoa izaten laguntzen dioten etengabeko berritze eta hobekuntza prozesuak dira.
Petronorrek instalazioak berrikusi eta berritzeko nahiz hobekuntzak inplementatzeko aurten antolatu duen bigarren geldialdia amaitu du. Oraingo geldialdia Petronorren 1. Fintze Unitatean egin da, findegiak dituen bi unitateetako handienean, urtean 7 milioi tona petrolio gordin prozesatzeko gaitasuna baitu.
Petronorrek 101 milioi euro inbertitu ditu guztira aurten egindako bi geldialdietan: 52 milioi euro Konbertsio unitatearen urtarrileko geldialdian eta 49 milioi euro 1. Fintze Unitatean egindako bigarren geldialdi honetan. Geldialdi honetan inbertitutako 49 milioietatik, 27 milioi euro instalazioak mantendu eta hobetzeko erabili dira eta 22 milioi euro inbertsio eta hobekuntza teknologikoetarako. Petrolio gordinaren labean airearen aurreberogailu bat instalatzea izan da lan hauetako hobekuntza nagusia. Iberiar Penintsulako findegi guztietan dagoen handiena da, eta horren bitartez, energia-eraginkortasuna hobetu eta CO2 isurketak murriztuko dira.
Unitate honetako azken geldialdia 2013an egin zen. Unitate honek Bilboko Portura iristen den petrolio gordina jaso eta prozesatzen du, konpainiaren beste unitate batzuei zerbitzua emateko. Geldialdian, 2. Fintze Unitateak normaltasunez funtzionatzen jarraitu du funtzio berbera betetzeko. Urtean 5 milioi tona gordin prozesatzeko gaitasuna duen 2. Fintze Unitate honi eta Petronorren gainerako instalazioei esker, hauek ere normaltasun osoz lan egin baitute, bezeroentzako zerbitzua une oro bermatuta egon da.
Guztira, 40 enpresatako 1.200 pertsonak baino gehiagok lan egin dute Petronorren geldialdi honetan. Segurtasuna lehentasunezkoa da Petronorren eguneroko jardunean, eta areago geldialdietan, eta horren kariaz, geldialdian parte hartu duten pertsona guztiek prestakuntza espezifikoa jaso dute prestakuntzan espezializatutako zentroetan. Gainera, Petronorrek segurtasun arloko aitorpena egin die geldialdian parte hartu duten enpresei, hauen segurtasun planak balioetsiz eta geldialdian esparru hau zaintzeko egindako ahalegina aintzat hartuz.
Petronorren Geldialdiak
Petronorren Geldialdiak etengabeko berritze eta hobekuntzarako prozesuak dira, findegiari eraginkorragoa izaten laguntzen diotenak. Horrela, Petronorrek ingurunearekiko zein ingurune hori partekatzen duten pertsonekiko konpromisoa berresten du etengabe.
Aurreko geldialdietan gertatu den bezalaxe, Petronorren oraingo Geldialdiak ere eragin positiboa izan du ingurunean, izan ere, tamaina horretako mantentze-lan handiek okupazio-maila altua eragin ohi diete eskualdeko ostalaritza eta ostatu zerbitzu ia guztiei.
Petronorri buruz
Petronorrek urtean 12 milioi tona petrolio prozesatzeko ahalmena du, Espainiako findegirik handiena bihurtu delarik. Plantillan 940 langile dituela eta beste 6.200 pertsonarentzako zeharkako enpleguak eraginez, eskualdeko enplegu-sortzailerik handiena bilakatu da. Azken bost urteotan, 1.200 milioi euroko guztizko inbertsioak bideratu eta 201 pertsona laneratu ditu.
Petronorrek Bilboko Portuko joan-etorri guztien % 40 baino gehiago eragiten du. Ekoizpenaren herena baino gehiago esportatzen du, hau da, Bizkaiko esportazio guztien % 18,21 edota Euskadiko ekoizpenaren guztizko balioaren % 9,7. Ogasunari egiten dion urteko batez besteko ekarpena 700 milioi eurotik gorakoa da, hots, Bizkaiko zerga-bilketa garbiaren % 10 baino zertxobait gehiago.