Hidrogenoaren Foro Sektoriala Energia Klusterrean 2021ean sortutako foro berria da, eta besteak beste, Euskadiko garapen teknologiko eta industrialerako estrategian hidrogenoa energia-bektoretzat txertatzea du helburu, Energibasquen jasota dagoen bezala. Elias Unzuetak proiektua azaltzeko eta euskal ekonomiaren etorkizuna aztertzeko parte hartu du jardunaldian, foroaren koordinatzailea den aldetik.
Balio-kate estrategikoen topagune izatea da foro sektorialen helburu orokorra, betiere izaera irekiari eutsiz eta networkinga eta lehia-adimena sustatuz. Horrek guztiak enpresen arteko lankidetzarako aukerak erraztu eta bultzatu behar ditu, ETEei arreta berezia emanez. “Hidrogenoaren eta honek dakartzan aukeren esparruan, egoera gori-gori dago, eta hau oso baliagarria da mobilizazioa eta agerpen mediatikoa sustatzeko. Puntu honetara iritsita, eta berreskuratze, eraldaketa eta erresilientziarako funtsen Europako programen barruan, behar-beharrezkoa da ekimenak erakartzen hastea epe luzeko finantzaketa-ereduak eta iraunkortasuna dituzten proiektuetan”, adierazi du Unzuetak.
Horretarako, beharrezkotzat jo du hidrogenoaren elektrolisi bidezko ekoizpena eta erregai-pilei atxikitako erabilera tarteko dituzten erronka estrategikoetan lan egitea, baita hasierako proiektuen erronka finantzarioetan eta merkatuaren sorkuntzaren inguruko erronketan ere. Erronka horiek guztiak gainditzen lagunduko duen osagaia izatea da Hidrogenoaren Foro Sektorialaren xedea: “Horren garrantzi estrategikoa lantalde bati dagokiona baino askoz ere handiagoa da. Foro Sektorialari esker, enpresek eta eragileek elkarrekin lan egin dezakete merkatu hori sortzeko. Aukerak argiak dira. Orain itxaropenekin jokatu behar da”, esan du Elias Unzuetak.