ALBISTEAK

Zinemaldia & Technology jardunaldian euren proposamena defendatuko duten bost proiektu finalistak aukeratu ditu Donostiako Zinemaldiaren baitako ekimen honek: AI-Driven Video Editing Platform britainiar aplikazioa, adimen artifizialaren bidez bideoak sortzeko eta editatzeko prozesuak automatizatzen dituena; Cinesmart kataluniar plataforma, big data baliatuz eta advergamingean oinarrituta, zinema-erakustegiei zuzenduta dagoena; Compliance Management Solution for the Film and TV Industry norvegiar plataforma, adimen artifizialean eta machine learningean oinarrituta egonik hainbat lurraldetako araudi espezifikoak betetzen laguntzeko balio duena; FilmChain, Erresuma Batuko enpresa batek garatutako aplikazioa, blockchain teknologiaren bitartez ikus-entzunezkoen alorreko eragile guztien arteko finantza-transakzioak errazten dituena; eta La Quinta Pared, Alemanian garatutako aplikazio mugikorra, non erabiltzailearen mugikorra film bateko protagonistaren mugikor bihurtzen den, narratiba transmedia ekarreragileen garapena sustatzeko.

Innobasqueren webgunean argitara emandako artikulu batean, Petronor eta Tecnaliako presidente eta Innobasqueko presidenteorde Emiliano López Atxurrak adierazi du berrikuntzak “herrialdeko proiektu” izan behar duela, pandemia sasoian areago, “gaur egungo gazteentzat bizi aukerak izaten jarraitzeko betebeharra delako, horiek gure berehalako etorkizunaren parte eta protagonista direnez”.

Repsolek eta Nortegas Green Energy Solutions-ek akordioa sinatu dute Repsol Taldearen hornitegietan ibilgailuentzako gas natural (IGN) sarea sortzea bultzatzeko. Biek abiatuko dituzten gasindegietako lehena Sestaon kokatuko da, zehazki Barakaldotik Trapagaranera doan errepideko 9,2 kilometroko Repsolen hornitegian, A-8ko lotunetik gertu.

Hiriko garraio astunerako –kamioiak eta autobusak– AutoGasez (gas likidotuaz) bultzatutako motorrak ekoizten dituen BeGas enpresak 5,2 milioi euroko kapital-handitzea eman du ezagutzera gaur, Ekarpen eta BBK bazkide berriek egindako inbertsioari eta Repsol, Innvierte CDTI, Easo Ventures, Itzarri eta EIN enpresek 2019ko abenduan abiarazitako inbertsioaren handitzeari esker.